काल अउ आज-
आज सुरता आथे ओ दिन जब संचार के कोनो माध्यम नई रिहिस, ककरो संसो खभर लेना होतिस त कोनो ल पठोवय, तब जाके कोनो सगा सोदर के सोर खभर मिलय। धीरे धीरे बिज्ञान ह तरक्की करिस अउ डब्बा वाले फोन बनइस, मनखे ल ओतको में सन्तुष्टि नई मिलिस, वोला सुधार के अपन हाँथ में ला डरिस, जेला हमन आज मोबाइल के नाव ले जानथन, धिरे धिरे ओमा मनोरंजन बर गाना, गेम अउ विडिओ ह समागे। आज देखथन Advantages-and-disadvantages-of-mobile (मोबाइल के फायदा नुकसान) का हे?
मोबाइल क्रांति –
मोबाइल के फायदा नुकसान के बात करे के पहिली देखथन ए मोबाइल क्रांति का आया ? मनखे के मन ताय कतको देदे नई भरय। केमरा अउ इंटरनेट ह मोबाइल में नवा क्रांति ला दिस, लोगन ह देश अउ दुनिया ले जुड़ीस। ये सोच के बड़ अजीब लगथे की पहली के मन बिना मोबाइल के किइसे राहत रिहिस होही, आज कल तो बिना मोबाइल के खाय भात ह नई पचय।आज होवत लइका ल घलो ओकर छट्ठी में मोबाइल गिफ्ट देथे। उठत बइठत, सूतत जागत, मनखे बस इही में भुलाय रहिथे। आज जेन ल देख तेन ह व्हाट्सब अउ फेसबुक के बात करत हे।
इंटरनेट क्रांति –
मोबाइल के फायदा नुकसान ल तभे जानबो जब इंटरनेट क्रांति ला जानबो । फेशबुक अउ व्हाट्सब के सेती कोनो जिनिस के जानकारी तुरते मिल जाथे, फेर कतको मनखे मन एकर उपयोग अनचित काम बर करत हे। अब तो बिहनिया कन पेपर पढ़े अउ रतिहा कन समाचार देखे के जरूरत नई होय, सबो ताजा खभर तो पहिली ले मिल जाय रहिथे।ये मोबाइल के सेती मनखे आज दुनिया अउ सगा सोदर के तीर सिरफ़ संसो खभर के नाम मे होय हे। मोला लगथे ये मोबाइल ह जब ले आये है तब ले अंगठा ह गोठियाथे, मुहू में तो तारा बन्धागे हे। सिरतोन केहे जाय त मोबाइल ल जेन काम बर सोच के बनाय गए रिहिस तेन ल छोड़ के बिनास के काम ह ज्यादा होवत हे।
मोबाइल के फायदा नुकसान –
मोबाइल के आय ले झूठ लबारी में घलो बढौतड़ी देखे गे हे। मोबाइल ल बनाय के पाछु सोच रिहिस की मनखे ह मनखे ले जुड़ जय, फेर कतको झन अइसे जुड़ीस की जिनगी भर भर नता बन गे। आज कल तो ये फेसन बरोबर बनगे हे, कोनो ह कथरी ल ओढ़े ओढ़े गोठियावत हे त कोनो ह सेप्टिक में खुसरे खुसरे खुसुर फुसुर करत हे। इहु मन ल जोड़े के पाछु मोबाइल के हाँथ हे। मोला लगथे ये मोबाइल के आय ले जतका फायदा होय हे ओतके नुकसान। येला सही ढंग ले उपयोग करे जाय त वरदान बन जाही।
-धर्मेन्द्र डहरवाल "हरहा" सोहागपुर जिला बेमेतरा
Leave a Reply