छत्तीसगढ़ी कहानी-कुंदरा-चन्द्रहास साहू

छत्तीसगढ़ी कहानी-कुंदरा

-चंद्रहास साहू

पांच हाथ के लुगरा , चिरहा अऊ मइलाहा जतका छेदा हावय तौन ला पहेनइयां हा नई जाने फेर मनचलहा मरदजात मन जान डारे हावय । उही ला माड़ी के उप्पर ले पहिरे हावय अऊ फुग्गा बाहां वाला पोलखा, पहुंची नरी मा रूपियामाला, भूरी चुंदी तेल फुल के अंकाल, आंखी मा काजर आंजे कजरारी ,कान मा चिकमिक -चिकमिक बजरहा खिनवा, मुड़ी मा डेंकची बोहे, बाहा मा मोटरी अरोये ,मोटरी मा दु झन नान्हे बड़का नोनी ला पाय भूरी चिकनी उचपुर सुघ्घर गोदना वाली मोटियारी आवय । एक हाथ मा रूंजु के काड़ी ला धरे हावय अऊ छाती मा ओरमत रूंजु ला बजावत राग अलापिस-

भोज नगर के दसमत कइना ।
सुंदर हावय घात ।।
राजा भोज के बाम्हन बेटी।
कुल बहमनीन के जात ।।

गुरूर-गुरूर, भुरूर-भुरूर घात सुघ्घर रूंजु हा नरियावय , एक कोती तुमड़ी अऊ बांस ला खुसेर के चार ठन तार ला झीक देहे अऊ बनगे रूंजु ,दु ठन खुटी अऊ खुटी ला जइसे अइठे लागे रूजु हा नरियावय टीनिन-टीनिन टुनुन,टुनून। धरमीन देवारिन हा मंदरस कस मीठ राग अलापथे वइसना रूंजु हा घला गुड़ कस मीठ नरियाथे। ंपारा के जम्मो मइनखे सकला जाथे अऊ धरमीन हा बिधुन होके गाथे अऊ राजा भोज के कहिनी कंतरी कहिथे।

राजा भोज, भोज नगर के राजा रिहिस जेखर सात झन नोनी रिहिस नान्हे नोनी के नांव दसमत आवय जौन हा अब्बड़ सुघ्घर बरन वाली रिहिस । एक दिन राजा हा पुछिस बेटी तुमन काखर किसमत के खाथो ओ। जम्मो बेटी मन राजा के किसमत के खाथन किहिस फेर दसमत किहिस ‘‘ददा मेहां अपन किसमत के खाथो अऊ जम्मो जिनावर घला अपन-अपन किसमत के खाथे ।‘‘ राजा भोज ला खिसियानी लागिस अऊ परछो लेइस । राजकुमारी दसमत कइना के बिहाव उडि़या देवार संग कर दिस । दसमत पुछिस अपन गोसाइया ला
‘‘तुमन का बुता करथो जी, भिनसरहा जाथो अऊ मुधियार ले आथो।‘‘

उडि़या देवार बताइस
“हमन जोगनी धरे ला जाथन ।”

“कइसे रहिथे जोगनी हा….. महुंं देखहु जोगनी ला ?” दसमत पुछिस मुचकावत अऊ उडि़या देवार हा किरिया खाइस आने दिन जोगनी ला लानहु । उडि़या देवार हा जोगनी ला लानिस दसमत ला मुचकावत देखाइस तब दसमत हा ठाढ़ सुखागे। तुमन हा हीरा मोती के बुता करथो अऊ मालिक करा गिस अऊ अपन भाग के जम्मो हीरा ला नंगा लिस आज दसमत कइना अऊ उडि़या देवार हा राजा भोज ले जादा पोठ होगे ।
ये जम्मो कहिनी ला सुनिस तब अब्बड़ उछाह मनावय गांव के मन अऊ धरमीन देवारिन ला चाउर दार नुन तेल ,साग भाजी आमा के अथान अऊ आनी बानी के खुला देके पठोवय । नानकून दुनो टुरी अऊ धरमीन बर रोटी बासी घला मिले । धरमीन हा एक गांव ले आने गांव इही कहिनी कंतरी ला बताये ला जावय अऊ अपन पेट के आगी ला बुताये ।

गांव के निकलती मा परिया अऊ परिया मा चार ठन खुटा ला गाडि़या दिस। कमचील ला नवाके झिल्ली -मिल्ली अऊ बांस टाट ला छाइस ओखर उप्पर पेरा ला फेक दिस अऊ बना डारिस अपन बर सुघ्घर ’’कुंदरा ..। तिरषूल वाला मुड़भर के देवता जेखर फुनगी मा लिमउ गोभाये हे , सांकर बाना अऊ बाजू मा झापी, झापी मा फोटो मुरती अऊ आनी बानी के जरी बुटी मंझोत मा पिड़हा कुहकु बंदन पोताये हे ,अतनी तो कुल देवता आवय जौन ला ओखर गोसाइया हा छोड़ के सरग चल दिस, जेखर पूजा अरचना करथे धरमीन हा । मइनखे हा किरिया खाके दगा देथे फेर लोहा के देवता ,पथरा के भगवान अऊ फोटू मा मुचकावत किशन हा जम्मो उछाह दुख मा पंदोली देथे , सहारा देथे का चाही येमन ला………? चुरवा भर पानी गुंगुर -धुप अऊ गुड़ के हुम,नानकुन नरिहर अऊ खोची भर तेल- बाती । जम्मो सियान अऊ लइका के रखवारी करथे इही देवता धामी हा। पाछु कोती नानकून कुरिया अऊ कुरिया मा नान्हे बडे़ ,दरजन अकन सुरा । हबराहा झबलु एक ठन कुकुर कथरी गोदरी, टिन टिप्पी , माली ,थरकुलिया फुटहा कड़ाही अतकी तो जैजात आवए धरमीन के जौन ला अपन संगं संग किजारथे।

कका काकी , भइयां भौजी देवर देरानी जम्मो कोई पांच सात ठन कुंदरा बनाके रहिथे । धरमीन हा गांव कोती ले लहुटिस तब ठाड़ सुखागे जम्मो कुंदरा ला छीही बिहि कर देये रिहिस । टीन -टप्पर ,कथरी गोदरी येती -वेती जम्मो कोती छिदरे- बिदरे रिहिस। कुंदरा के कमचील ,टाट झिल्ली -मिल्ली बिगरे रिहिस अनर -बनर । सुरा कुरिया घला फुटगे रिहिस अऊ ढेये -ढेये कहिके सुरामन नरियावय । काखर का अनीत कर डारेव भगवान मेहां जेमा मोर कुंदरा ला छति -गति कर डारे हावय परमातमा , का होगे …? धरमीन गुणे लागिस । जम्मो जिनिस ला सकेले लागिस नान्हे टुरी मन रोये फेर धरमीन हा आंसु ला पी डारे ।

’’ये राड़ी देवारीन, दुसटीन इहा ले भाग नही ते मार डारहू’’ एक झन रेगडू हड़हा बॉस बरोबर उचपुर नानकुन मुहू के मइनखे हा खिसियावत किहिस । मुहू तो नानकुन रिहिस फेर ओखर भाखा अब्बड़ बीख रिहिस।

’’का होगे सरपंच साहेब ,मेहां तो मोर रद्दा मा आथो मोर रद्दा जाथो काखरो लाटा-फांदा मा नई राहव ’’। धरमिन किहिस
’’वाह रे भकतीन ,गांव गांव गली गली मा चाल चिन्हावत रेंगत हावस अऊ अभी सधवइन बनत हस’’ सरपंच हा धरमीन के गोठ ला सुनके किहिस ।
’’तोर सुरा हा खार खेत ला खुरखुंद मताथे अऊ तेहां गांव ला । अपन मरद ला खाये हस इहां के मरद ला अपन मोहो मा फॉस के वहू ला खाये के उदीम करत हस कलजागरीन’’ सरपंच हफरे लागिस।

’’ये भुइयां ला, ये गांव ला छोड़ के आने गांव जावव। इहां ला झन बिगाड़ो। ये भुइया मा मेहां बियारा बनाहु ,धान अऊ गहू चना मिंजहू’’ सरपंच किहिस ।

’’दसो बच्छर ले हावन ये जगा मा,नई छोडव। खैरखाडाढ़ के तीर मा रेहेव तब बरदिया हा खेदारिस। ठाकुर दाई तरिया के पार मा रेहेव तब पटईल हा बखानिस अऊ पीपर के छइंया बर कोटवार हा झगरा करिस। कहा जावव नोनी बाबू ला धरके………? .गरीब के सुते बर चार हाथ के भुंइया घला नई मिले ………वाह रे भगवान… ! मोर मरद नइ हावय तब तेहां मोला कुकुर गत करत हस,इजत ला बेचत हस’’ धरमीन किहिस ।
’’तोर का इजत रही रे छिनार, अपन मास ला बेचके रोटी मंगइयां’’ सरपंच किट किटावत किहिस ।

’’मोर इही मांस बर तोरो नियत डोलगें रिहिस ,मोर भुइयां मोर माटी झन कह काया हा घला माटी होही । भरे पइसा के गरब झन कर कफन के कपड़ा मा खिसा नई होवय । हाय चीज ,हाय बस,हाय-हाय रपोटो -रपोटो झन कर महल अटारी के रूदबा झन देखा कुंदरा के लइक घला नई होबे सरपंच’’ धरमीन हा रोवत रोवत अतकी तो किहिस।

सरपंच के खेदारे ले काहां जाही बपरी हा ….? ओखर आने लागमनी हा जाये के तियारी करत रिहिस ।
ये सुवारथी समाज मा राड़ी के कोनो इज्जत हे का………? चील गिधवा कस आंखी ला गडि़याये रहिथे धरमीन उप्पर ,भाग ले दु ठन आंखी हावय जादा आंखी होतिस ते का होतिस …?.. एक मुडी दु आंखी मा जम्मो टूरी मन बर ,मोटियारी मन बर नियत डोलथे फेर रावण के दस मुड़ी बीस आंखी रिहिस ओखर नियत हा सिरिफ एके झन माइलोगिन माता सीता उप्पर डोलिस । ये एक मुड़ी वाला सिरतोन के रावण आवय कि दस मुड़ी वाला हा रावण आए …..? कइसे जीयो भगवान मेहां, मोर नोनी हा पढ़ लिख के अगुवाही कहिके इस्कूल मा भरती करे हॅव कइसे पढावव…….? कइसे सहो ताना ला कइसे बचावव लाज ………? धरमीन हा गुने लागथे।

कहिथे ना एक ठन रद्दा हा मुंदाथे तब आने रद्दा के कपाट हा उघरथे । धरमीन बर आज शीतला दाई बरोबर बनके आइस दसमत नाव के डोकरी हा , सरपंच के अनीत के भोगना भोगत हावय यहु हा । अपन बियारा के एक ठन कोंटा मा कुंदरा बनाये बर दिस दसमत डोकरी हा। धरमीन अब उही मा रेहे लागे ।

बेरा हा भुरके उडा़ये लागिस । सरकार के योजना ले सुरा लिखाइस ओखर बर एक झन चरवाहा लगा दिस धरमीन हा। मास्टर मन हा अब्बड़ पंदोली देवय पढ़ई-लिखई मा जम्मों जिनिस बर। आज बड़की नोनी हा बारवीं किलास ले आगर होगे अऊ नान्हे हा दसवीं ला पढ़े लागिस। उम्मर होइस अऊ सुघ्घर टूरा खोजके बड़की के बिहाव करिस। ददा हा दारू पी-पीके सिरागे रिहिस फेर धरमीन हा आज दाई ददा बनके कन्या दान करिस। एक-एक चुरवा पानी मा गगरी भर जाथे वइसना एक-एक पइसा सकेले लागिस धरमीन हा। अऊ छोटकी बर टिकली फूंदरी के दुकान खोल दिस। छोटकी हा पढाई मा पातर राहय अऊ दुकानी ला सुध्घ्घर चलाइस। आज गांव मा घर बनाइस दु कुरिया के सिरमीट के छत वाला ।
बड़का अऊ जब्बर रूख हा गरेर मा ढलंग जाथे फेर नान्हे कोवर रूख हा कतको गरेरा आवय जम्मो ला सही लेथे। धरमीन घला जम्मों ला सहीस अऊ जब्बर ठाढे रिहिस। घुरवा के दिन घला बहुरथे वइसना धरमीन के दिन घला बहुरगे। जांगर खंगे लागिस फेर अपन रूंजु मोटरी अऊ गोदना के जम्मो जिनिस ला धर के जावय। आज गांव के निकलती सरपंच के बियारा कोती ला देखिस तब ठाढ सुखागे, चार ठन बास अऊ कमचील के तनाये कुंदरा बने रिहिस जिहां सरपंच हा टुटहा अऊ दोनगा खटिया मा सूते रिहिस ओखर गोड़ मा घांव, घांव मा पीप अऊ माछी भिनभिनावत रिहिस। जांगर नई चले अऊ मुहू अब्बड़ चले।

‘‘तोर बोली भाखा मोला लगगे धरमीन ! कुंदरा ले तोला भगाये हंव अऊ उही कुंदरा मा मेहां फेकाये हंव। बहु हा बस्साथे कहिथे , बेटा हा दुतकारथे अऊ नाती हा घिल्लाथे अऊ जम्मो कोई मिलके मोला ये कुंदरा मा फेक दिस। कोनो देखे ला आये, न कोनो पुछे ला। दु दिन होगे भातबासी घला नई खाये हंव।‘‘

सरपंच रोये लागिस। धरमीन हा झोला ले रोटी के कुटका निकालिस अऊ सरपंच ला खवाइस सरपंच गोबोर-गोबोर खाये लागिस। छिमा मांगिस सरपंच हा अऊ कुंदरा ला ससन भर देखके किहिस-

’’मइनखे ला मइनखे बनके रहना चाही धरमीन। महल अटारी के गरब रिहिस मोला सिरतोन कुंदरा के पुरती नई होवय, मोला छिमा कर दे धरमीन ’’सरपंच रोये लागिस अब गोहार पार के।
—000—

चन्द्रहास साहू
धमतरी
छत्तीसगढ
मो न 8120578897