गुरूनानक जयंती पर गीत-
हे गुरूनानक देव के, आज परब परकास
-रमेश चौहान
गुरूनानक जयंती पर गीत
हे गुरूनानक देव के, आज परब परकास ।
अपन हाथ ला जोर के, करत हवंव अरदास ।
ओ तलवंडी गांव मा, बन आये भगवान ।
दाई तृप्ता हा रहिस, ददा रहिस कल्याण ।
सुघ्घर पावन दिन रहिस,कातिक पुन्नी मास ।
हे गुरूनानक देव के, आज परब परकास ।
अपन हाथ ला जोर के, करत हवंव अरदास ।
रहिस नानपन ले अलग, जगत मोह ले दूर ।
अपने मा खोये रहय, रहय अपन मा चूर ।।
पंडित मौली ले घला, करय प्रष्न ओ खास ।
हे गुरूनानक देव के, आज परब परकास ।
अपन हाथ ला जोर के, करत हवंव अरदास ।
गुरू नानक के काम मा, चमत्कार ला देख ।
जेने जानय तेन हा, लेवय माथा टेक ।।
करे फेर उपदेश हे, देत अपन आभास ।
हे गुरूनानक देव के, आज परब परकास ।
अपन हाथ ला जोर के, करत हवंव अरदास ।
गुरूनानक हा हे कहे, ढोंगी दुनिया देख ।
मनखे मनखे एक हे, देवता घला एक ।।
हे गुरूनानक देव के, आज परब परकास ।
अपन हाथ ला जोर के, करत हवंव अरदास ।
हे गुरूनानक देव के, आज परब परकास ।
अपन हाथ ला जोर के, करत हवंव अरदास ।
-रमेश चौहान
